Mrs1amology:【會展站出發！灣景鮑魚黑毛豬自助餐】

新開嘅會展站好靚呀！是日訂咗灣景廳嘅自助晚餐，終於可以到此一遊喇～因為會展站B3出口步行10分鐘就到灣景國際啦，好快好方便！之前我地黎過幾次啦，雖然地方唔算大，但自助晚餐時間窗外可以睇到日落靚景，而且食物款式絕對不少，質素亦係水準以上，仲要有林小朋友最愛嘅朱古力噴泉同埋我最愛嘅片皮鴨添，所以灣景廳自助晚餐長期Keep住響我地嘅encore list之上～今次自助餐主題係仲要係「鮑魚．黑毛豬」，真的不錯，皆因林小朋友最愛食嘅豬就係黑毛豬，啱曬～二人前撐撐檯腳去！

食自助餐好多人都好重視冷盤，呢度就有麵包蟹、新西蘭生蠔、藍青口等，仲有各式刺身包括三文魚、八爪魚、鯛魚、北海道帶子、希靈魚、甜蝦等等，絕對滿足到海鮮迷；不過家長們其實更注重熱食同甜品要啱小朋友！今次林小朋友就由頭食到尾十分enjoy，似乎對一系列黑毛豬美食好滿意～排名以林小喜好列出，推介一下～

#香脆黑毛豬腩肉卷

啖啖肉入口，十分鬆軟，肉嫩又香口，個豬皮仲十分香脆，小朋友表示十分Yummy！原來呢個黑毛豬腩肉卷需時3天而成，要先將黑毛豬去毛，薄切，加入百里香及蒜蓉等，以75度火慢煮12至14小時，再入爐220度烤焗12分鐘至表皮呈現香脆金黄色，絕對係手工野，我都話林小真係好識食咖啦。。。

#梅菜煎黑毛豬肉餅

用黑毛豬梅頭肉加入梅菜剁碎拌勻成圓餅，一口一件，兩面金黃焦香，入口juicy~好有家常味道:) 小朋友一個人食3、4件，輕鬆啦～

#香烤黑毛豬頸肉泰式沙律

呢款沙律好好食！黑毛豬頸肉用香茅、蔥、辣椒等醃製12小時後，再於表面抹上椰糖，入爐焗至淺金黄色，片片都香口又juicy，加埋清新蔬菜平衡油香，剛剛好！

#日式鮑魚昆布沙律

另一款有驚喜嘅沙律，我refill左2次！8頭鮑魚大大隻啖啖肉用酒煮過，鮮嫩彈性仲有淡淡海洋味道，再上黃蘿蔔同菜，味道好有層次又好fresh～

#鮑魚瑤柱海皇粥

十分驚喜嘅粥！好多朋友知我同女都唔食粥，其實我地只係唔喜歡滾粥，呢碗口感綿糯，入味又甘香嘅粥底，絕對是我所愛～粒粒開花的米米，見到都開心呀：）裡面有元貝、瑤柱、鮑魚，啖啖都係細緻又細滑海鮮香～～～！！

#花雕鮑魚雲耳炆雞

媽媽們必吃！去骨三黃雞肉嫩多汁、配彈牙鮑魚，酒香濃郁，仲伴上爽口雲耳，惹味又有層次感，十分喜歡！

「鮑魚．黑毛豬」自助晚餐優惠

星期一至四：成人$498 / 長者$468 / 小童$428

星期五至日、公眾假期及前夕：成人$538 / 長者$508 / 小童$478

#後記

好多人問我，一大一小去食自助餐會唔會唔方便？盡量揀場地細小小嘅廳，仲最好坐近食物區嘅檯，方便出入之餘，如果小朋友唔跟出去，都可以望到嘛；如果小朋友想出去拎野食，都唔使行太遠，跌多過食就。。。。。啦。。。 而且大人仲要帶多個小袋仔，緊要野跟身會更好~ 其實二人前自助餐都一樣可以好輕鬆！